Eurozone no Irish Time. Durante a nosa estancia en Madrid entrevistounos Guy Hedgecoe de varios medios, entre eles o Irish Time. Este é o resultado: http://www.irishtimes.com/news/world/europe/euro-heist-as-gruesome-as-a-tarantino-gangster-film-1.1619936 Ms De Lorenzo

Pois xa estamos de volta. A verdade é que foi un pracer poder adicarnos só a subirnos ao escenario para actuar, sen ter que preocuparnos de mais nada durante este mes. Quedamos contentos do noso paso polo CDN, como creo que quedaron eles contentos con Chévere. A verdade é que xa molaba repetir para o ano que ven. Afortunadamente seguimos por Galicia e Portugal. Ah, e saiu outra crítica de Eurozone en Madrid, menudo dossier de prensa que nos traemos! http://avionesdesplumados.blogspot.com.es/2013/11/eurozone-compania-chevere.html?spref=tw

O fotógrafo Gabriel Tizón visitounos durante a nosa estancia en Madrid e deixounos este agasallo. Fotaza na porta do CDN cuns cans que andaban por alí. Chegarás lonxe Gabriel Tizón... Grazas.

E outra crítica boa: http://www.playgroundmag.net/musica/noticias-musica/actualidad-musical/los-chicos-de-tarantino-la-lian-en-el-banco-central-europeo

Este é o enlace da nova no telexornal da galega sobre Chévere en Madrid. Como non temos costume de que se fale nestes espazos de Chévere, prestounos moito. Grazas a Sabela Romar, redactora da TVG en Madrid. Comentounos posteriormente que a nova tivo picos de audiencia. A verdade é que nunca entenderei como se miden estas cousas... http://www.crtvg.es/informativos/o-grupo-chevere-baila-con-merkel-en-lavapies-no-espectaculo-eurozone-699046

Madrid leva 10 días sen recollida de lixo por unha folga dos traballadores da empresa encargada do servizo, despois de que este fose privatizado. Van botar á rúa a máis de 1000 persoas e ao resto vanlle recortar o salario nun 40% (gañarán entre 600-700€). A cidade é unha esterqueira, as papeleiras rebentan de merda, os parques están asulagados polo lixo... E nós iniciamos a terceira semana de funcións. Este martes moitísima xente. Vai ser boa a semana.

E pola noite debate no CDN dentro do ciclo "Los lunes con voz". O tema era "Eurozone, hai alternativas? Pero ao final o debate estivo polarizado e diminuído pola presenza dun ponente tirado dunha tertulia de Intereconomía que salferiu o diálogo con ideoloxía precociñada e lugares tan comúns que aborrecían a un santo. O resto ben, capeando o temporal como puideron, aí estiveron Carlos Berzosa, Ricardo Zaldívar e César Molinas tratando de dar algunhas claves para entendermos a crise e os horizontes de futuro da Unión Europea. Foi curioso ver este debate dentro do espazo escénico da obra, dáballe outra perspectiva pero quedáballe que nin pintado. 

Onte foi un día moi completo. Pola tarde fumos a Torrespaña, onde teñen a sede dos informativos de TVE para participar no programa de cultura da canle 24 horas. A verdade é que todo o mundo nos tratou moi ben, especialmente ben, mesmo con cariño. Será que non estamos afeitos. Especialmente próximo foi Moisés Rodríguez, a quen agradecemos de corazón o apoio e simpatía que nos ofreceu desde que veu ver a obra con José Hervás, a quen tamén coñecimos e saudamos antes de entrar no plató. Tamén pasaron por alí os presentadores Lara Síscar e Diego Losada, que é de Monte Alto. Tivemos a oportunidade de ser espectadores dun informativo que se fai en directo e ver de perto ao presentador Antonio Gárate á fronte. Esta foto documenta este momento.

Esta última finde fixemos as funcións en galego con sobretítulos en castelán. Deu traballiño e houbo que facer un pase coas rapazas que levaban o sobretitulado, pero ao final quedou moi ben. Aquí tedes un aspecto de como se veían os títulos proxectados en plena función.

En Lavapies non somos os únicos en usar a imaxe de Rodrigo Rato, hai quen pide xustiza e castigo directamente. Mesmo o can parece estar agardando a que se faga xustiza.