Este ano cumprimos tres décadas! Para facer memoria do que foi Chévere ao longo destes anos, cedemos a palabra a quen mellor pode facelo: o público. Persoas de varias xeracións falan da súa relación con Chévere, lembran como coñeceron ao grupo, que sentiron ao ver algunhas das obras, que relación teñen coas súas vidas...

Macías tiña 17 anos cando o seu instituto programou unha viaxe a Compostela para ver unha función de Río Bravo na Nasa. Cóntanos como ían desconfiados e como volveron encantados, como preferiron volver ver a obra cando se puxo en Noia antes que saír de marcha como adoitaban facer cada sábado. Como Río Bravo quedou como un nexo de unión entre os seus compañeiros e como despois quixo seguir vendo máis teatro.