Parte do traballo de creación de Eroski Paraíso supuxo pasar moitas horas entrevistando á xente que unha vez traballara no Paraíso, ou que contribuíra dalgún xeito a crealo. Entre eles estiveron Tucho Carou e Manolo do Paraíso, antigos xestores da sala, que nos cederon parte do material que aínda conservaban, e que se incorporou posteriormente ao espectáculo.

Neste vídeo, Miguel de Lira ofrécevos un percorrido polas distintas reliquias do Paraíso que fomos atopando polo camiño: cascos, lámpadas, rótulos... Obxectos saídos doutro tempo que andaban amoreados en fallados e almacéns, e que hoxe, no teatro, axúndannos a transportarvos a outro tempo e contarvos esta historia.