Nestes primeiros meses de 2019 tócanos dicirlle adeus a Eroski Paraíso, a obra coa que levamos xirando dende 2016 e que se converteu nunha das pezas máis queridas polo público de Chévere.

Antes do adeus definitivo aínda nos queda unha función derradeira no Teatro Gayarre de Pamplona. Porén, a día de hoxe, podemos contarvos xa que viron o espectáculo máis de 31.000 persoas, repartidas en 128 funcións. Destas funcións, 75 foron en Galicia e 53 noutras comunidades ou países, cunha taxa de ocupación global do teatro do 75%.

Eroski Paraíso pasou por escenarios como os de Las Naves del Español-Matadero Madrid, o Teatro Central de Sevilla, o Alhambra de Granada, o Rialto de Valencia e o do Théâtre 13 / Seine de París, dentro do Festival don Quijote.

Se quededes con ganas de máis logo da despedida, recordámosvos que o texto da obra está dispoñible dentro da colección Biblioteca de Teatro da Editorial Kalandraka, e que, nos vindeiros meses, o director Jorge Coira estreará o filme realizado a partir da peza teatral.