Chegou o día, ou os días. En Madrid fixemos dúas estreas. Unha foi un pase especial para profesionais acreditadas en MadFeria, a feira de artes escénicas que se celebra estes días en Madrid. O remate da función foi emocionante, nunca antes víramos aplaudir posto en pé a un público formado maioritariamente por programadores e programadoras procedentes de moitas partes de España. Despois de encaixar esta experiencia única e enormemente gratificante, ao día seguinte fixemos a estrea oficial dentro da programación do Teatro Español cunha sala absolutamente chea. Quédannos por diante tres semanas de teatro.