Do 22 ao 25 de maio celebrouse unha nova edición do Festival de Cans, que dende 2004 recolle boa parte da produción audiovisual galega. Nesta ocasión, Chévere ao completo acudiu ao festival para presentar a versión cinematográfica da súa obra Eroski Paraíso, un proxecto dirixido por Jorge Coira/Xron que se realizou grazas á colaboración entre dúas produtoras culturais independentes, Chévere e OlloVivo, e contou co apoio do Concello de Teo, Vegalsa-Eroski e Deleite.

Logo do tradicional desfile en chimpíns polas rúas de Porriño, o equipo da película entrou no ateigado salón de baile do Círculo Recreativo Cultural para asistir á proxección. Aínda que isto é cine, o ambiente e a resposta do público foron os mesmos que na función de teatro e ao rematar os aplausos prolongáronse durante moitos minutos. A capacidade dunha historia tan local para conectar con todo tipo de públicos, a habilidade de Jorge Coira para traducir á linguaxe do cine a narrativa escénica da peza orixinal e a forza interpretativa de Patricia de Lorenzo, Miguel de Lira e Cristina Iglesias sorprenderon, convenceron e emocionaron. Estade atentas, porque Eroski Paraíso estrearase en salas a finais de 2019.