En Outubro de 2010 Chévere presentou no Auditorio Municipal da Ramallosa (Teo), promovida por ese concello, esta Ultranoite dedicada ao cooperativismo. Trátase de usar o teatro como instrumento de sensibilización e comunicación de temas como, neste caso, o cooperativismo. Aproveitar a capacidade do teatro para establecer un diálogo directo co espectador co fin de transmitir conceptos, ideas ou coñecementos de calquera outra disciplina.

En 2012 o concello de Teo acollerá en residencia á compañía Chévere, tras chegar a un acordo de cesión do auditorio municipal e de co-financiamento do proxecto, que conta tamén co soporte e apoio de Agadic. Así que a partir de agora Teo será o escenario para as Ultranoites, para os espectáculos de Chévere e para moitas máis actividades culturais, escénicas e teatrais. Despois de 25 anos traballando en Santiago de Compostela, Chévere emigra a un lugar máis acolledor para reinventarse, onde se respiran as gañas de facer cousas.

Contamos con todos vós nesta nova aventura!