Paul Ansell está considerado como un dos artistas punteiros da actual escena Rockabilly inglesa, xunto a Darrel Higham ou Imelda May. Comezou a principios dos 90 con Blue Rythm Boys, para gañar fama internacional á fronte do seu grupo definitivo, Number Nine, co que leva xa gravados once discos. O último gravouno en Nashville e é unha obra mestra de influencias country, que leva por título Love Conquers All. É no que mellor amosa a súa prodixiosa voz e ese gusto exquisito para darlle un toque persoal aos clásicos do Rock´N´Roll.
Porén, Paul Ansell pode ser confundido cun “impersonator” de Elvis, debido á súa estreita colaboración con Scotty More, que fora guitarrista do rei do rock. Pódeselles ver a ambos os dous, en compañía doutras estrelas das seis cordas, no documental “A tribute to The King”. Paul Ansel chegou a dobrar ao actor Harvey Keitel cando interpretaba cancións de Elvis na coñecida película “Finding Graceland”. Tamén soa na banda sonora da película Nun recuncho da Toscana, cantando It's Now or Never.
A lista de colaboracións de Paul Ansel inclúe nomes destacados como Robert Gordon, Billy Swan, Sonny Burges, Billy Lee Reiley, Reggie Young, Mac Curtis e David Briggs.