• 

  O retrete de Dorian Gray

IN MEMORIAN é o título da nova obra do Retrete de Dorian Gray, que se presenta en abril en Santiago de Compostela. Unha peza de teatro de obxectos na que se traballa con fotografías antigas.

IN MEMORIAM é un exercicio de apropiación de imaxes de persoas que morreron hai máis de cen anos. Un poema visual sobre a perda da memoria individual. Unha danza macabra fotográfica para celebrar o esquecemento. Un desfile fantástico de retratos animados á procura de si mesmos.

Cando Percival morre, o seu retrato con bombín ve con impotencia como lle pasa por diante a película da súa vida nunha secuencia de fotos que acaban dentro dunha caixa de madeira. Perci entón inicia a persecución desa caixa que garda a súa memoria e entra nun inframundo ausente de lóxica, habitado por fotografías dispostas a sucumbir ao seu destino. As imaxes e os recordos vanse perdendo polo camiño. A caixa ábrese e alí dentro nese baleiro escuro Perci descúbrese na máis inmensa soedade, participando nun baile frenético consigo mesmo por manter viva a súa memoria na eternidade, inutilmente.

O Retrete de Dorian Gray son Ezra Moreno e Marcos Ptt, co-creadores e manipuladores. Dramaturxia e dirección: Xron. Produción: Belém Brandido. Arranxos gráficos: Guiti. Iluminación: Fidel Vázquez. Son: Xurxo Pinheiro. Construción de bonecos e escenografía: Kukas, Pepe Penabade, Señor Lobo, C.V.

Entradas na billeteira da Zona C dúas horas antes da función e no Teatro ou adiantadas na billeteira do Teatro Principal de Santiago.