• 

  Chévere

Dous anos despois de iniciar o proxecto Eurozone, Chévere entra na última fase da súa distribución. Agora podemos dicir que Eurozone foi unha especie de vacina teatral contra os efectos perversos da crise. Unha obra feita desde o curruncho máis afastado para botar unha mirada crítica e perplexa a esta Europa dominada por elites extractivas. Unha obra que percorreu toda España como un orballo persistente en sintonía cos ventos democráticos que azoutan o réxime do 78.  A primeira produción galega programada en tempada en Madrid polo CDN, onde colleitou un éxito indiscutible. En fin, unha obra feita para contribuír ao debate do presente, que xa foi vista por máis de 10.000 persoas en 21 cidades.

Eurozone foi unha produción ambiciosa para contraatacar estes tempos de crise, unha obra coral con 8 actores e actrices en escena e un equipo de case 20 persoas. Un traballo de creación colectiva que se foi artellando desde cero ao longo de dous meses de ensaios. Un proceso que estivo aberto a calquera persoa a través de Redenasa, onde permanecen visibles os diarios de todo o equipo. Eurozone recibiu 4 Premios María Casares que outorga a Asociación de Actores e Actrices de Galicia: Mellor Espectáculo, Mellor Escenografía, Mellor Iluminación e Mellor Actriz Secundaria.

Eurozone na canle 24h de TVE

Crítica de J.Vallejo en El País

Crítica Revista Godot (Madrid)

Crónica de Pepe Henríquez en Diagonal

Reportaxe na BBC (en inglés)

Reportaxe no Irish Times (Irlanda)

Eurozone é unha farsa sobre a crise da zona euro, sobre o fin da idea de Europa tal e como a entendemos ata agora, sobre un sistema democrático deslexitimado que só conta coa cidadanía para ir votar cada certo tempo, sobre unha clase dirixente que só exerce o poder no seu propio beneficio, sobre o secuestro da democracia por parte do sector financeiro. Eurozone alimentouse da nosa perplexidade como cidadáns, da nosa impotencia, da nosa carraxe fronte a uns poderes que nos culpabilizan deste fiasco, ao que respondemos con humor e certa mala hostia.

Eurozone é un achegamento ao gran atraco especulativo ao máis puro estilo Tarantino e co referente directo de Reservoir Dogs. Queremos establecer un diálogo entre a nosa peza e Reservoir Dogs, contar ao público cales poden ser os paralelismos entre os personaxes de Reservoir Dogs e os principais líderes político-económicos de EUROPA, esas persoas que están decidindo desde un despacho o noso futuro. Poñamos que un grupo de persoas que representan á clase dirixente europea acaban de cometer o atraco do século. E imaxinemos que, contra todo pronóstico, algo saiu mal. Entón collemos a esta xentiña e a metemos nun deses edificios de autor, monumentais e inútiles, que tanto lles gustan, unha cidade da cultura, unha cidade das artes ou simplemente un casino sen inaugurar... E facemos estoupar as súas fráxiles relacións, e intentamos comprender a lóxica das súas decisións ou retratar a súa soedade utilizando contra eles a nosa rabia e a nosa indignación. Quen é o señor azul da política europea? Quen é o señor marrón das finanzas? Quen é o señor branco da diplomacia?

En escena: Patricia de Lorenzo, Miguel de Lira, Manuel Cortés, Mónica García, Arantza Villar, Iván Marcos, Pepe Penabade, Borja Fernández. Dirección e dramaturxia: Xron. Escrita: Manuel Cortés. Iluminación: Fidel Vázquez. Espazo sonoro: Xacobe Martínez Antelo. Espazo escénico: Javier Domingo Ballestín e Chévere. Coreografía, loita: Iván Marcos. Espazo audiovisal: Cuco Pino/Quadra producións. Construción escenografía: Enrique Martínez. Produción: Juancho Gianzo. Comunicación: Xana García. Deseño gráfico: Fausto Isorna. Deseño web: A Navalla Suíza. Unha produción Chévere, compañía residente no concello de Teo. Apoio: Agadic, Concello de Teo. Duración: 90 minutos