• 

  Chévere

O novo traballo de Chévere está protagonizado por Patricia de Lorenzo e Miguel de Lira, con dramaturxia e dirección de Xron. En escena tamén están Lucía Estévez e Leticia T. Blanco, que se ocupan da gravación e realización de vídeo en directo. Ademais, conta coa participación de Fidel Vázquez (iluminación), Óscar Villán e Iván Suárez (espazo gráfico), Xacobe Martínez Antelo (espazo sonoro), Renata Uzal (vestiario) e Inés Portela (produción).

Nos últimos anos Chévere realizou unha serie de traballos que exploraron as posibilidades do teatro-documento e a memoria colectiva como desencadeantes dunha ficción teatral (Citizen, Eurozone, Eroski Paraíso...). Este novo proxecto é un paso máis para afondar nos mecanismos narrativos que xorden na fronteira entre a realidade e a ficción, entre a historia e a lenda, entre a pantalla e o escenario.

Coma outras veces, partimos dunha historia moi local. Nesta ocasión trátase dun relato que se foi transmitindo oralmente de xeración en xeración entre a xente da comarca de Verín (Ourense), durante os últimos noventa anos. Recollemos in situ os testemuños da xente, os seus recordos e as súas palabras. Organizamos o rexistro de todo este traballo en gravacións sonoras ou en vídeo. E con todo este material metémonos no local de ensaios para darlle forma teatral. Gústanos poñer a idea en movimento sabendo de onde partimos, pero sen saber exactamente a onde chegaremos.

CURVA ESPAÑA, a historia da curva na que se matou España

Curva España trata sobre un crime aparentemente sen resolver, unha morte violenta que provoca sospeitas e interrogantes sobre os seus autores, motivacións e consecuencias. A partir da existencia de distintas versións sobre o caso, artellamos unha peza que bebe do xénero policial, ironiza sobre o formato documental combinando teatro e cine en directo e funciona como unha alegoría da construción do estado nación español coma se fose a promesa dun tren que nunca chegou. Porque a esta zona afastada e fronteiriza España apenas chegou en forma de mito, e o mito fala da súa morte nunha curva.

Curva España é a traslación á escena dun deses documentais sobre casos sen resolver (true crime) que inzan as plataformas de contidos audiovisuais tipo Netflix ou HBO. O escenario funciona coma un plató no que se van executando, gravando e editando en directo as distintas secuencias nas que se estutura a historia. Unha historia que dá para falar da España Baleirada, das consecuencias da Lei Mordaza, da unidade nacional ou de como a xente constrúe narrativas alternativas á historia oficial. Pódese describir como unha obra cinescénica, un thriller documental ou unha autoficción, sen renunciar a seguir facendo un teatro político que fala de nós mesmos e de como as promesas incumpridas do pasado afectan ao presente.

 

CALENDARIO DE ACTUACIÓNS 2019-2020

25 XULLO 2019 MIT Ribadavia (estrea)

21 AGOSTO 2019 Feira Artes Escénicas Castilla y León, Ciudad Rodrigo

4 SETEMBRO 2019 FETEGA Carballiño

28-29 SETEMBRO 2019 Verín, Auditorio Municipal

11-12 OUTUBRO 2019 Santiago de Compostela, Auditorio de Galicia

18-19 OUTUBRO 2019 A CORUÑA, Teatro Rosalía de Castro

25 OUTUBRO 2019 O BARCO, Teatro Lauro Olmo

26 OUTUBRO 2019 NARÓN, Pazo da Cultura

8 NOVEMBRO 2019 LALÍN, Salón Teatro

9 NOVEMBRO 2019 GONDOMAR, Auditorio Lois Tobío

 

16 XANEIRO 2020 VIGO, Teatro AFundación. Entradas á venda a partir do 24 decembro www.ataquilla.com

17 XANEIRO 2020 PONTEVEDRA, Teatro AFundación. Entradas á venda a partir 24 decembro www.ataquilla.com

19 XANEIRO 2020 LUGO, Auditorio Gustavo Freire

24-25 XANEIRO 2020 OURENSE, Teatro Principal

31 XANEIRO 2020 AMES, Casa da Cultura de Bertamiráns

4-15 MARZO 2020 MADRID, Teatros del Canal. Entradas aquí

20 MARO 2020 CARBALLO, Pazo da Cultura

21 MARZO 2020 VILAGARCÍA, Auditorio

25 ABRIL 2020 BARAKALDO

6 XUÑO 2020 LAS ROZAS, Centro Cultural Pérez de la Riva

+ info: http://redenasa.tv/gl/residencias/curva-espana/