RedeNasa.tv - Os vídeos

Río Bravo

Thu, 02 Feb 2012 21:17:06 +0100

Río Bravo foi un western trepidante co que os Chévere comezaron a atopar a súa identidade, e (pensamos) un dos proxectos máis queridos polo público da compañía. Este é o vídeo promocional da primeira versión da obra, que se fixo no ano 91 para mover o espectáculo fóra do Telón de Grelos. Así soaba Rio Bravo en castelán. O vídeo foi realizado baixo a dirección e segundo o criterio de Roberto Vidal Bolaño.

Supersonic: o mal non acouga

Mon, 30 Jan 2012 16:59:34 +0100

Seguimos rescatando vídeo-documentos dos inicios de Chévere, no ano que se cumpre o 25 aniversario da compañía. Hoxe deixámosvos unha reportaxe da TVG, con aquel seu estilo tan propio dos 80, sobre Supersonic. Un trepidante espectáculo de 1988 que empezou na rúa para logo instalarse nas salas. Unha visión disparatada, irreverente e iconoclasta dun texto de Josep María Bernet (Supertot), que se convirte nunha homenaxe escénica ao disparatado mundo dos comics.

A Visita

Thu, 26 Jan 2012 11:39:42 +0100

Este vídeo é o dosier dun proxecto de intervención escénica que Chévere enviou á Bienal de Barcelona de 1990, un evento que entón trataba de romper límites entre linguaxes artísticas. Evidentemente o proxecto non foi seleccionado. Pero 20 anos despois convírtese nun documento excepcional, non só por evidenciar a inxenuidade duns rapaces que intentaban innovar formatos teatrais ás tolas, senón por amosar anacos dunha cidade que estaba en plena transformación urbana. Podedes ver As Fontiñas en construción, as leiras de Meixonfrío antes do boom inmobiliario, os baretos do Franco antes da chegada das viñotecas e os todoacen...

Happening na Facultade de Matemáticas

Fri, 20 Jan 2012 21:14:29 +0100

Hai moitos anos, nos comezos de Chévere, o xeito que tiña a compañía de captar público era ilo buscar a onde estivese. Por exemplo, se queres que vaian ao teatro os estudiantes, ti vas facer teatro a clase.

Superbad: Chévere no 88

Thu, 19 Jan 2012 21:41:34 +0100

Na nosa última incursión arqueolóxica ao arquivo de Chévere dimos con esta peza do ano 88: o vídeo da presentación dos produtos Chévere feita en decembro do 88 no mítico Número K de Santiago. Pase de modelos dos personaxes de Supersonic, petiscos de danza ou avance de diálogos para unha serie sobre o marisqueo salvaxe titulada Berberechévere. En fin, unha festa.

Tamén está gravado o público. Alguén se recoñece?

Manuel Fraga. Punto Final

Tue, 17 Jan 2012 17:59:08 +0100

Rescatamos esta curta da peli colectiva "Hai que botalos" que fai un retrato sentimental, pero sen concesións, da traxectoria de Don Manuel. Dirixido por Emiliio MacGregor, guión de Manolo Rivas e interpretación de Pepe Penabade. Voz en off de Fede. Unha parte do vídeo rodouse na difunta Nasa.