Neste vídeo-reportaxe de Quadra Producións podedes achegarvos á experiencia de levar ás Fillas Bravas actuar a unha casa da aldea de Solleiros (Esteiro, Muros) para un grupo de veciñas, coas que compartimos un tempo de lecer, conversa e comida en clave feminina.

Recuperar o valor do teatro como lugar de encontro, convivencia e debate público. Establecer unha conversa aberta entre creadoras e veciñas. Reinventar os tempos de lecer das mulleres do rural adaptándoos aos seus ritmos de vida. Crebar as fronteiras entre o público e o privado. E ademais, neste caso, contrastar cun grupo de mulleres maiores os contidos e argumentos dunha obra de teatro que utiliza o cancioneiro popular galego para expoñer un modelo empoderado de muller, vencellado á vivencia do mundo rural.

A experiencia foi moi produtiva e satisfactoria, toda a xente saiu pensando xa na próxima. Abríronse novos xeitos de vivir o teatro e de facelo circular fóra dos circuítos establecidos, facéndoo accesible a novos públicos.