• 

  Chévere

Chévere recupera o seu espectáculo Alá no fondo hai sitio abondo para o Salón do Libro Infantil e Xuvenil de Pontevedra, que se celebrará no Pazo da Cultura entre o 27 de febreiro e 28 de marzo e que nesta ocasión leva por título "Da ciencia á ficción".

Se queres, podes ver un resumo do espectáculo aquí.

O Circo Atómico das Irmás Feinman vainos dar a coñecer un dos avances científicos máis asombrosos da historia da humanidade: a nanotecnoloxía, unha tecnoloxía capaz de construír máquinas biolóxicas, crear formas de vida dirixidas por humanos e feitas a medida. O Circo Atómico das Irmás Feinman trasládanos ao inframundo dos átomos para que vexamos como son, como se comportan e como poden transformar as nosas vidas nun futuro que xa está aquí. Circo de pulgas, fenómenos de feira, maxia, teatro de variedades ou music-hall, todas as linguaxes do espectáculo son aptas para lograr a escenificación do coñecemento científico.

Idea e creación: Chévere. Actrices: Patricia de Lorenzo, Arantza Villar, Pepa Yáñez. Textos: Manuel Cortés. Dirección: Xron. Escenografía e vestiario: Carlos Alonso. Produción: Carmen Fernández. Técnico en xira: Fidel Vázquez. Vídeo: Gael Herrera. Comunicación: Xana García. Asesor científico: Jorge Mira.

Alá no fondo hai sitio abondo estreouse na Casa das Ciencias da Coruña o 10 de novembro de 2007 e foi presentada posteriormente no MARCO de Vigo, o CGAC de Santiago, o Museo Provincial de Lugo e o Museo Municipal de Ourense. Esta obra foi un encargo da Dirección Xeral de I+D+I da Consellería de Innovación e Industria da Xunta de Galicia para a Semana da Ciencia 2007.